Flytjendur » Eurobandið » Um flytjanda
Eurobandið
Eurobandið
Eurobandið var stofnað í mars 2006 af Friðriki Ómari og Regínu Ósk en þau tóku bæði þátt í Söngvakeppni Sjónvarpsins sama ár. Regína lenti þá í öðru sæti með lagið Þér við hlið en Friðrik Ómar í þriðja sæti með lagið Það sem verður. Friðrik Ómar tók einnig þátt í Söngvakeppni Sjónvarpsins árið 2007 með lagið Eldur en þá lenti hann í öðru sæti. Aðrir meðlimir Eurobandsins eru bassaleikarinn Róbert Þórhallsson, gítarleikarinn Kristján Grétarsson, Benedikt Brynleifsson á trommur og hljómborðsleikarinn Grétar Örvarsson, sem söng Eitt lag enn með Siggu Beinteins í Sagreb árið 1990. Grétar er einnig annar höfunda lagsins Nei eða já sem Heart 2 Heart flutti í Malmö árið 1992.
Árið 2007 gaf Eurobandið út lag Bucks Fizz, Making Your Mind Up, með íslenskum texta undir titlinum Við sigrum að ári. Þau Friðrik Ómar og Regína Ósk stóðu við þau orð og sigruðu með yfirburðum í Laugardagslögunum í febrúar 2008 með laginu This Is My Life.