Árið 1992 hóf hljómsveitin Jet Black Joe upp raust sína og náð strax gríðarlegri hylli landsmanna enda afburða rokkband þar á ferð. Sveitin sendi frá sér þrjár plötur; Jet Black Joe (1992), You ain't here (1993) og Fuzz (1994) auk fjölda laga sem komu út á ýmsum safnplötum.

Einnig varð sveitinni nokkuð ágengt utan landsteinanna og út komu tvær stórar plötur víðsvegar í Evrópu og Asíu auk nokkurra smáskífna. Jet Black Joe hætti störfum snemma árs 1996 og meðlimirnir sneru sér að öðrum störfum, bæði í tónlist og öðru.

Sumarið 2001 komu þeir Gunnar Bjarni Ragnarsson og Páll Rósinkranz flestum á óvart með því að blása lífi í bandið á ný á Eldborgarhátíðinni og viðbrögðin létu ekki á sér standa. Fólk þyrsti enn í að heyra og sjá þessa ókrýndu konunga íslenskrar rokktónlistar.

Greatest hits sem innihélt mörg bestu lög sveitarinnar var svo gefin út árið 2002 á tvöfaldri plötu, sem var vel fagnað af plötukaupendum enda margt efni sveitarinnar verið ófáanlegt um nokkurn tíma.

© Bárður Örn Bárðarson