Kvartett Ó. Jónson & Grjóni

Kvartett Ó. Jónson & Grjóni varð til úr rústum hljómsveitarinnar Púff, snemma árs 1995 og var skipaður þeim Viðari Hákon bassa, Sigurjóni Guðmundssyni gítar og orgel, Ólafi Jónssyni gítar og Þorvaldi Gröndal trommur og orgel. Skömmu eftir stofnun kvartettsins mátti heyra fyrstu lög þeirra; Þú kemur með mér og Tími á Rímíni á safnplötunni Strump í fótinnn, sem Spor gaf út. Ári síðar sendi kvartettinn frá sér og gaf sjálfur út fjögurra laga sjö tommu plötu sem innihélt meðal annars endurhljóðritun lagsins Þú kemur með mér.

Sveitin gerði og myndband við lagið sem var valið frumlegasta tónlistarmyndband ársins 1996 af Ríkissjónvarpinu.
Sumarið 1997 kom svo út sautján laga plata á merki Smekkleysu í útgáfuröðinni Skært lúðra hljómar. Platan bar titilinn Karnival í Texas. En titill plötunnar var fenginn af bíómyndarprógrammi sem hékk uppi á veitingarstaðnum Bíóbarnum, en þar var um tíma helsta vígi kvartettsins.

Þá átti kvartettinn útsetningu og flutning á heiðursplötu Megasar Megasarlögin og er á henni að finna útgáfu kvartettsins á laginu Heimspekilegar vangaveltur um þjóðfélagsstöðu. Kvartettinn Ó. Jónsson & Grjóni gerði fleira en að efna til tónleika og gefa út plötur. Þeir störfuðu talsvert með Gjörningarklúbbnum sumarið 1997. Meðal þess sem þeir tóku sér fyrir hendur var að færa Reykjavíkurborg brunnlok með nafni sveitarinnar í afmælisgjöf. Þeir brugðu sér og til Þýskalands þar sem þeir settu upp sýningu í einu af fínni leikhúsum Berlínar, Prader Volksbühne sem þeir nefndu The Icelandic Cowboys Carnival.

Það var svo fimmtudagskvöldið 27. nóvember 1997 sem Kvartett Ó. Jónsson og Grjóni hélt sína síðustu tónleika. En þeir félagar ákváðu vegna annarra starfa að leggja Kvartettinn niður.

©&® Bárður Örn Bárðarson

Vinsældarlistar

Vinsældarlisti Rásar 2