Flytjendur » Lay Low » Um flytjanda
Lay Low
Lay Low
Lovísa Elísabet Sigrúnardóttir fæddist í London árið 1982 en þar býr faðir hennar sem er ættaður frá Sri Lanka. Ung að aldri fluttist hún til Íslands með móður sinni, sem er íslensk.
Snemma byrjar Lovísa að læra á píanó en á unglingsárum færði hún sig yfir í önnur hljóðfæri eins og gítar og bassa. Lovísa hefur stundað nám í ýmsum tónlistarskólum og tók m.a. 1 ár í FÍH á rafbassa. Nú í haust er hún að hefja nám á Tónsmíðadeild Listaháskóla Íslands.
Lovísa hefur spilað með ýmsum hljómsveitum gegnum tíðina eins og Stratus, Blúsbandi Thollyar og Stardust Motel, og með hljómsveitinni Benny Crespo's Gang.
Það var ekki fyrr en snemma á árinu 2006 sem hún byrjar að semja sína eigin tónlist og koma fram undir nafninu Lay Low en nokkrum mánuðum áður hafði hún verið að byrja með kántrýband með vinkonum sínum, en helmingurinn af því bandi fór erlendis um tíma. Síðan þá hafa hlutirnir verið að gerast hratt og útgáfufyritækið Cod Music bauð henni plötusamning fyrir sólóverkefnið Lay Low. Í október 2006 kom út fyrsta plata hennar sem heitir því skemmtilega nafni Please Don't Hate Me og platan sló rækilega í gegn. Lögin Mojo Love, Boy Oh Boy sem og titilagið slógu rækilega í gegn en titillagið, Please Don't Hate Me, var notað í kvikmynd Baltasars Kormáks, Mýrin. Rétt fyrir jólin 2007 fékk Lay Low svo afhenta gullplötu til marks um sölu á 5.000 eintökum af plötunni.
Til fylgja plötunni eftir spilaði Lay Low út allar trissur. Hún fór m.a. annars í hringferð með þeim Ólöfu Arnalds og Pétri Ben undir nafninu Rás 2 plokkar hringinn. Tilgangur ferðarinnar var að gefa tónlistaráhugafólki á landsbyggðinni tækifæri til að sjá og heyra fremsta tónlistarfólk landsins af yngri kynslóðinni í heimabyggð. Einnig spilaði hún víðsvegar um Evrópu og Bandaríkin við góðar undirtektir.
Í maí 2007 hljómaði lagið Mojo Love af plötunni Please Don't Hate Me í sjónvarpsþættinum Grey's Anatomy, sem var einn vinsælasti sjónvarpsþáttur heims.
Á Íslensku tónlistarverðlaununum árið 2007 fékk Lay Low flestar tilnefningar, fjórar talsins. Hún fór heim með þrenn verðlaun, sem besta söngkonan og vinsælasti flytjandi ársins og fyrir plötuumslag ársins.
Í desember 2007 leit frumburður hljómsveitarinnar Benny's Grespo's Gang dagsins ljós, þar sem Lay Low er fullgildur meðlimur.
Á haustmánuðum árið 2007 byrjar Lay Low að gera tónlist við leikritið Ökutímar eftir Paula Vogel. Hlutverk Lay Low var í upphafi að taka að sér tónlistarstjórn verksins í samráði við Maríu Reyndal leikstjóra. Fljótlega þróaðist verksvið Lay Low útí að taka fullan þátt í sýningunni á sviði og því var í raun um að ræða frumraun hennar á leiksviði. Lay Low samdi 5 ný lög fyrir sýninguna ásamt því að leita í smiðju amerísku kantrýstjörnunnar Dolly Parton og flutti Lay Low ein 8 lög eftir kantrýstjörnuna fjörugu í sýningunni með sínu nefi. Lagið "Saman" sem Lay Low samdi fyrir sýninguna ómaði í útvarpinu á meðan á leiksýingunni stóð og í framhaldinu var mikið spurt hvort að tónlistin komi ekki út. Lay Low og Cod Music tóku því höndum saman í samstarfi við Leikfélag Akureyrar og gáfu út tónlistina úr Ökutímum á geisladisk fimmtudaginn 24. janúar 2008.