Moses Hightower heldur tónleika á Faktorý

12. ágúst 2010 Moses Hightower heldur tónleika á Faktorý föstudaginn 13. ágúst en hljómsveitin Sindur sér um upphitun. Húsið opnar kl. 22 og byrja tónleikarnir stundvíslega kl. 23. Aðgangseyrir er 500 kr.

Sálarkvartettinn Moses Hightower er að fylgja eftir fyrstu plötu sinni, Búum til börn, sem kom út í júlí. Hljómsveitina skipa Magnús Trygvason Eliassen trommari, Andri Ólafsson sem syngur og leikur á bassa, Daníel Friðrik Böðvarsson gítarleikari og Steingrímur Karl Teague sem syngur og spilar á hljómborð. Á tónleikum, sem og á plötunni, kemur kvartettinn fram með blásurum og bakröddum sem ljá lögunum seiðandi seventísblæ.

Hinn kvartettinn sem kemur fram á Faktorý nefnist Sindur og samanstendur af þeim Kristjáni Tryggva Marteinssyni, Björk Níelsdóttir, Charlotte Haesen og Ellu van der Woude. Þessi hálf-íslenska, hálf-hollenska hljómsveit hefur aðsetur í Amsterdam þar sem meðlimir hennar eru við nám, störf og leik. Hljómsveitin tvinnar saman ólíkum stílum en tónlistinni mætti helst lýsa sem þjóðlagaskotnu poppi. Það litar tónlistina að þau koma úr ólíkum áttum á listasviðinu og af þeim sökum má fólk búast við skemmtilegri blöndu söngradda og hljóðfæra.

Úr dómum um plötuna Búum til börn:
**** „Þetta er ofursvöl tónlist [...] full af tilþrifum og tilfinningu“ T.J. Fbl.
***** „Snilldarverk [...] Fáar plötur láta manni líða jafn vel“ H.H. Mbl.
9/10 „Þeir eiga texta ársins [...] Þetta er frábær hljómsveit.“ A.J. Rás 2