Stórtónleikar Rásar 2 á Menningarnótt

16. ágúst 2010 Einn af hápunktum Menningarnætur í ár verður án efa TÓNAFLÓÐ 2010 – Stórtónleikar Rásar 2, Nova og Exton, þar sem margir af dáðustu og vinsælustu listamönnum þjóðarinnar koma fram: Gunnar Þórðarson ásamt Rokksveit, stjörnurnar í Dikta, hin eina sanna Grafík með Helga Björns og Andreu Gylfa, og Pollapönkararnir sívinsælu úr Hafnarfirði.

Tónleikarnir fara í ár fram á besta stað í bænum, í hjarta borgarinnar, við Arnarhól. Sviðið verður staðsett upp við Tollhúsið (Kolaportið) þannig að nóg verður plássið fyrir fólk á öllum aldri til að safnast saman eftir ánægjulegan dag í borginni, en Reykjavíkurborg og aðstandendur tónleikanna leggja áherslu á þá ósk sína að fjölskyldan njóti kvöldsins saman.

Dagskráin er þannig saman sett að allir fái eitthvað við sitt hæfi, ungir sem gamlir!

Dagskráin er svona:
20:15 – Pollapönk
20:55 – Dikta
21:30 – Grafík
22:20 – Gunni Þórðar og Rokkestra
Þessar tímasetningar munu standa og allt kapp verður lagt á að dagskránni verði lokið klukkan 23.00, en strax að tónleikum loknum hefst hin árlega flugeldasýning  Menningarnætur.

Á milli hljómsveita mun hinn eini sanni Ingó Veðurguð stjórna brekkusöng Nova, en Nova er helsti bakhjarl tónleikanna í ár ásamt Exton.