Miðnæturtónleikar Seabear á Menningarnótt

17. ágúst 2010 Hljómsveitin Seabear hefur svo sannarlega verið að gera það gott undanfarin misseri, eftir óteljandi tónleikaferðir um Evrópu og Bandaríkin.

Nýjasta plata sjömenningana, We Built a Fire,  kom út hjá Morr Music í mars á þessu ári og allar götur síðan hefur sveitin vakið mikla athygli fyrir töfrandi tónleika víða um lönd.

Lög Seabear hafa hljómað í mörgum þekktustu og vinsælustu sjónvarpsþáttum vestanhafs, eins og Gossip Girl og Grey's Anatomy auk þess sem hljómsveitin hefur verið eftirsótt á tónlistarhátíðir. Mun sveitin leggja aftur í hann í lok ágúst, þegar stefnan er sett á tónleikaför með kimono um Þýskaland, Austurríki og Sviss. Í október verður svo farið í aðra ferð um gjörvöll Bandaríkin þannig að ekki sitja þau Sindri, Dóri, Kjartan, Örn Ingi, Sóley, Guggí og Inga auðum höndum.

Tækifæri til tónleikahalds hér á landi hafa verið fá, ef frá eru taldir útgáfutónleikar í Iðnó og Inspired By Iceland tónleikar í Hljómskálagarðinum. Seabear vilja gera bragarbót á þessu, og því verður blásið til tónleika á Sódóma Reykjavík á Menningarnótt, laugardaginn 21. ágúst. Mun sveitin stíga á svið á miðnætti, þegar formlegri dagskrá í miðbænum er lokið. 18 ára aldurstakmark er á tónleikana og kostar litlar 1000 kr inn.