Opið hús og tónleikar í Rokkheimi Rúnars Júlíussonar

24. ágúst 2010 Ljósanæturhelgina 3-5. september, verður opið hús í upptökuheimili Geimsteins og opið í Rokkheimi Rúnars Júlíussonar.

Líkt og allar Ljósanætur hingað til geta gestir og gangandi kynnt sér húsakynni upptökuheimilisins. Engum hurðum er lokað og hægt verður að svala forvitninni um starfsemi hljóðversins og útgáfunnar og skyggnast á bakvið tjöldin í þann heim sem er flestum leikmönnum framandi.

Á Ljósanótt 2009 var opnað safn í skúrnum við Skólaveg... sem er betur þekkt sem Rokkheimur Rúnars Júlíussonar. Rúnar hafði alltaf haft hug á því að reisa skúr við húsið en hann átti að sjálfsögðu ekki að vera undir bílinn, heldur eitthvað tengt tónlistinni. Rúnar var mikill safnari og við skyndilegt fráfall hans ákváð fjölskylda hans að opna safn í skúrnum sem færi yfir ferilinn hans í máli, myndum, munum og músík.

Í ár verður bætt um betur og haldnir verða tónleikar í innkeyrslunni. Þar munu koma fram listamenn á vegum Geimsteins útgáfunnar sem er ansi vegleg þetta árið. Það eru: Deep Jimi and the Zep Creams, Valdimar, Lifun, Klassart og Bjartmar og Bergrisarnir. Tónleikarnir verða á laugardeginum á milli kl. 15 og 17 og nánari dagskrá verður auglýst síðar.

Opnunartími er sem hér segir:
Föstudagur kl. 16 - 18
Laugardagur kl. 13 - 18
Sunnudagur kl. 13 - 18

Allur aðgangur er ókeypis, alla helgina.