Nýtt lag frá Sálinni

26. ágúst 2010 Sálin hans Jóns míns hefur sent frá sér glænýtt dægurlag sem ber heitið Fyrir utan gluggann þinn. Samhliða tónleikahaldi í sumar hefur sveitin verið að hljóðrita plötu og gefur nýja lagið forsmekk af því sem koma skal. Segja má að töluverður lúðrablástur einkenni nýja lagið og verður sá tónn nokkuð áberandi á plötunni í heild. Platan er unnin að töluverðu leyti í samvinnu við Stórsveit Reykjavíkur og er það liður í viðleitni Sálverja að útvíkka hljóm bandsins, þótt fullmikið sé að tala um byltingu í því sambandi, því auðvitað eru Sálareinkenninn enn til staðar.

Platan er væntanleg í nóvember, en hún verður fyrsta stúdíóplata Sálarinnar síðan Undir þínum áhrifum kom út árið 2005.