Alexander Rybak kemur fram á Jólagestum 2010

30. ágúst 2010 Norska stórstjarnan Alexander Rybak mun koma fram á jólastórtónleikunum Jólagestir Björgvins laugardaginn 4. desember í Laugardalshöllinni.

Rybak kom, sá og sigraði í 54. Eurovision keppninni sem haldin var árið 2009 í Moskvu, með laginu Fairytale, sem hann samdi sjálfur. Hann vann keppnina með miklum yfirburðum; hlaut samtals 387 stig og bætti þar með stigamet Lordi, sem árið 2006 hlutu 292 stig.

Eins og kunnugt er stóð Jóhanna Guðrún sig stórkostlega í keppninni fyrir Íslands hönd og hafnaði í öðru sæti. Sérstaklega gaman er frá því að segja að Jóhanna Guðrún er einnig meðal þeirra listamanna sem koma fram á tónleikunum og það sem meira er; Jóhanna og Rybak munu taka lagið saman, í allra fyrsta skipti.

Í kjölfar Eurovision keppninnar gaf Rybak út sína fyrstu plötu, sem nefndist Fairytales eftir vinningslaginu, og náði hún miklum vinsældum í meira en 25 löndum víðs vegar um heiminn. Hann hefur verið duglegur að ferðast um Evrópu og hefur selt upp meira en 100 tónleika síðastliðin misseri sem hafa laðað að samtals rúmlega 300 þúsund manns. Í sumar kom út ný plata með kappanum, No Boundaries, og hefur hún hlotið góðar viðtökur almennings og gagnrýnenda.

Alexander Rybak er önnur alþjóðlega stórstjarnan sem staðfest er á Jólagesti 2010, en fyrir nokkrum dögum var tilkynnt að breski tenórinn Paul Potts, fyrsti sigurvegari Britain's Got Talent, yrði meðal söngvara í ár. Ljóst er að hér er að verða til tónlistarviðburður sem á sér engin fordæmi hérlendis. Enn frekari tilkynninga er að vænta innan skamms.