Útgáfutónleikar Deep Jimi and the Zep Creams

07. september 2010 Rokksveitin Deep Jimi and the Zep Creams heldur tónleika í tilefni af útgáfu á fjórðu breiðskífu sveitarinnar BETTER WHEN WE‘RE DEAD. Tónleikarnir verða haldnir á Faktorý við Smiðjustíg á fimmtudagskvöld og hefjast tónleikarnir klukkan 23:00.

Hljómsveitin sem var stofnuð fyrir hartnær tuttugu árum og hefur hún verið mis afkastamikil í gegnum tíðina. Eftir hana liggja nú fjórar breiðskífur og tvær smáskífur. Deep Jimi hefur alltaf sótt mikið í sarp sjöunda áratugarins, sérstaklega hipparokks í þyngri kantinum. Á nýjustu afurð sveitarinnar er ekki um neina kúvendingu að ræða en aðspurðir segjast piltarnir hafa reynt að vanda sig meira en oft áður bæði hvað varðar lagasmíðar og hljómgæði. Þorvaldur Bjarni sér um upptökur og útsetningar og má heyra þess glögg merki í góðum hljómi skífunnar. Ekki eru fyrirhugaðir margir tónleikar á næstunni en sveitin mun þó leggja leið sína norður um heiðar í byrjun október auk þess sem hún mun leika á Airwaves hátíðinni seinna í sama mánuði.

Hér er því um fágætt tækifæri að ræða til að sjá þessa goðsagnakenndu sveit á tónleikum og ættu allir rokkunnendur að láta sig málið varða.

Húsið opnar kl. 22:30
Tónleikarnir byrja stundvíslega kl. 23:00 Aðgangseyrir er 1.500 kr.