Frítt: Lagið Þitt auga úr kvikmyndinni Sumarlandið

08. september 2010 Föstudaginn 17. september næstkomandi verður kvikmyndin Sumarlandið frumsýnd og af því tilefni hafa aðstandendur myndarinnar ákveðið að gefa lagið Þitt auga með Sigurði Guðmundssyni og Memfismafíunni endurgjaldslaust hér á Tónlist.is. Lagið hefur hljómað á öldum ljósvakans síðustu misseri en það er aðallag myndarinnar.

Sækja  SIGURÐUR GUÐMUNDSSON OG MEMFISMAFÍAN » ÞITT AUGA
(Hægri smelltu og veldu Save Target As/Save Link As til að sækja lagið)

Sumarlandið fjallar um venjulega fjölskyldu í óvenjulegum rekstri. Í húsinu þar sem þau búa í Kópavoginum kennir ýmissa grasa. Húsmóðirin, Lára (Ólafía Hrönn Jónsdóttir) er virtur miðill og er auk þess í góðu sambandi við álfheima. Í garðinum þeirra er stór álfasteinn og Lára vitjar íbúa steinsins daglega og sinnir þeim vel.

Óskar, eiginmaður hennar (Kjartan Guðjónsson) sér um að markaðssetja hæfileika eiginkonu sinnar en hann hefur einnig lagt talsverða vinnu og heilmikið fé í að koma sér upp nokkurs konar draugasetri í kjallara hússins með það fyrir augum að laða að ferðamenn. Hann er ekki í nokkrum vafa um að fjárfesting hans skili fljótt hagnaði.

Aðsóknin að draugasafninu er heldur undir væntingum og þar sem Óskar hafði farið of geyst við uppsetningu safnsins stendur hann nú frammi fyrir því að geta ekki staðið í skilum og gjaldþrot blasir við. Hann reynir að klóra í bakkann og heldur vandanum leyndum fyrir konu sinni.

Af tilviljun kemst hann í samband við þýskan sérvitring sem gerir honum tilboð í álfasteininn í garðinum. Tilboð sem myndi leysa fjárhagsvanda fjölskyldunnar að fullu. Nú eru góð ráð dýr. Óskar veit hug konu sinnar sem myndi ekki láta það hvarfla að sér að raska ró álfanna í steininum. Hann sér hins vegar ekki neina aðra leið en að slá til og steinninn er seldur og fluttur á brott. Í kjölfarið fer að halla undan fæti hjá fjölskyldunni og Óskar grípur til sinna ráða.

Leikstjóri: Grímur Hákonarson
Handrit: Ólafur Egilsson & Grímur Hákonarson
Leikarar: Ólafía Hrönn Jónsdóttir, Kjartan Guðjónsson & Magnús Torfi Magnússon
www.sumarlandid.is