Fjögur vinsæl leikrit eftir Thorbjörn Egner endurútgefin

01. mars 2010 Fjögur vinsæl leikrit eftir Thorbjörn Egner hafa nú verið endurútgefin. Leikritin eru Kardimommubærinn, Karíus og Baktus, Dýrin í Hálsaskógi og Síglaðir söngvarar.
Plöturnar innihalda gömlu góðu upptökurnar sem allir kannast við og má segja að þær eru með vinsælustu plötum íslenskrar útgáfusögu. Ætla má að þessar fjórar plötur hafi samtals selst í rúmlega 100.000 eintökum og eru Kardimommubærinn og Dýrin í Hálsaskógi með mest seldu plötum Íslands.

Höfundur verkanna sem hér eru á ferð, Thorbjörn Egner, fæddist í einu af eldri hverfum Oslóar 1912. Hann var menntaður í myndlist og starfaði lengi við auglýsingagerð og myndskreytingar. Snemma á stríðsárunum fór Egner að semja og myndskreyta sögur fyrir krakka. Hann átti að baki yfir  tuttugu bækur fyrir krakka þegar elsta verkið í þessu safni,  sagan um Karíus og Baktus,  kom út í Noregi 1949. Egner heillaðist ungur  af leiklist, samdi leikþætti og bjó  til leikbrúður þegar á námsárum sínum. Bækur hans urðu til þess að hann var ráðinn við barnatíma norska ríkisútvarpsins 1946: þar heyrðust raddir þeirra  Karíusar og Baktusar, Mikka refs og Soffíu frænku fyrst.  

Egner var fjölhæfur maður: hann skrifaði sögur og samtalsverk, samdi vísur og sönglög, bjó til brúður,  teiknaði og málaði, tók saman lestrarbækur fyrir skóla, og var mikilvirkur þýðandi. Þegar sögur hans tóku að umbreytast í leiksýningar  í Noregi seint á sjötta áratug síðustu aldar var Egner allt í öllu: teiknaði búninga,  hannaði leikmynd og bjó til plaköt.

Thorbjörn lést í hárri elli á aðfangadag jóla 1990 og átti þá að baki fjölskrúðugan feril. Þjóðkunnur maður í heimalandi sínu. Verk hans og persónur lifa góðu lífi eins og þessi útgáfa á hljóðritunum af frumuppfærslum verka hans hér á landi sannar.