Morðingjarnir fagna Flóttanum mikla

02. mars 2010 Morðingjarnir hafa verið duglegir við spilamennsku síðan Flóttinn mikli kom út í nóvember síðastliðnum. Ekki hafa enn verið haldnir formlegir útgáfutónleikar þrátt fyrir heljarinnar gleði í versluninni Havarí daginn sem platan kom út. Núna hyggjast Morðingjarnir bæta úr því og blása til útgáfutónleika af gamla skólanum á skemmtistaðnum Batterí föstudaginn 5. mars.

Ásamt Morðingjunum munu koma fram hljómsveitirnar Jan Mayen og Reykjavík!

Jan Mayen hafa lítið spilað undanfarið en eru, að eigin sögn, í góðu spilaformi, og luma jafnvel á nýju efni. Sveit sem spilar leiðinlega sjaldan, en þá er bara þeim mun meiri ástæða til að láta sig ekki vanta.

Reykjavík! eru Íslandsmeistarar í tónleikatryllingi og ætla í þriðja sinn að sprella með Morðingjunum á útgáfugiggi, en þeir spiluðu einnig á útgáfutónleikum fyrir plöturnar Í götunni minni og Áfram Ísland!