Útgáfutónleikar kimono

02. mars 2010 Hljómsveitin kimono verður með útgáfutónleika í Íslensku óperunni þann 11. mars kl 20:00 og er ekkert aldurstakmark á tónleikana.

Hljómsveitin kimono gaf út sína þriðju hljóðversplötu í desember síðastliðnum við góðar undirtektir tónlistaráhugamanna.  Platan fékk nafnið Easy Music For Difficult People og var jaðarútgáfunni Kimi Records falið að koma henni í hendur áhugasamra hlustenda. Það hefur gengið svona vel og hafa gagnrýnendur keppst við að hlaða gripinn lofi. Plata Ársins á Morgunblaðinu; Plata ársins á rjominn.is; sú þriðja besta að mati Fréttablaðsins; 7. Besta platan að mati hlustenda Rásar 2 og loks var hún tilnefnd í flokknum „Poppplata ársins“ á Íslensku tónlistarverðlaununum sem fara fram síðar í mars.  Eins hefur henni verið vel tekið af rokkunnendum og skreið hæst í 7. Sætið á Tónlistanum. Lítið hefur þó heyrst af plötunni í útvarpi og hafa meðlimir sveitarinnar bent á titil hennar því til útskýringar. Enginn veit þó hvað þeir eiga við með því.  

kimono hafa spilað grimmt síðustu þrjá mánuði við rífandi undirtektir og nú á að reka lokahöggið með formlegum útgáfutónleikum í Íslensku Óperunni.  Þremenningarnir Kjartan, Alex og Gylfi ætla að tjalda miklu til þetta kvöld og verður engu til sparað til að sjá til þess að tónleikarnir verða sannkölluð veisla fyrir eyru og augu. Nánari lýsingu á innihaldi og efnisgerð tónleikanna, fyrir utan það að þeir verða í þremur pörtum, verður haldið leyndri að sinni svo ekki sé spillt fyrir upplifuninni.

Miðasala er í Íslensku Óperunni alla virka daga milli 14 og 18 og milli 12 og 18 um helgar. Einnig fást miðar á Miði.is í verslunum Skífunnar og á opera.is