Trúbatrixur rísa úr dvala

08. mars 2010 Þá er loksins komið að því, Trúbatrix á Íslandi rís úr dvala vetrarins og slær til upphitunnar fyrir komandi vorfiðring í hjörtum landans, fimmtudagskvöldið 11. mars.

Trúbatrixur hafa tekið höndum saman við tónleikastaðinn Batteríið og ætla að halda regluleg kvöld og kynna í hvert skipti til leiks ný og fersk atriði, þekkt andlit sem og aðeins styttra komin, hljómsveitir, sóló flytjendur, tríó, o.s.frv.

Fyrsta kvöldið í seríunni verður Acoustic kvöld með stúlkum á borð við Þórunni Antoníu og Láru Rúnarsdóttir sem ætla báðar að gíra sig aðeins niður að þessu tilefni og munu þær báðar koma fram sóló. Eitt atriðanna er nýtt af nálinni en það er Country tríóið með Tinnu Marínu í fararbroddi. Með henni spila þeir Daníel Auðunsson og Leifur Björnsson. Þau hafa aðeins komið fram einu sinni áður en það á eftir að breytast með hækkandi sól og vel þess virði að sjá.

Myrra Rós mun stíga á stokk og dusta rykið af gömlum lögum ásamt Andrési Lárussyni bassaleikara og einnig mun Elín Ey koma fram sem hefur skipað sér sess sem ein af efnilegri blús söngkonum landsins og gaf nýverið út sína fyrstu plötu, See you in Dreamland.

Síðast en ekki síst viljum við kynna hana Nönnu Hilmars, unga dömu úr Keflavík sem kallaði sig áður Songbird en er komin með tvo unga menn á bakvið sig og kalla þau tríóið sitt "Of monsters and men".

Nokkrar af þeim sem fram koma voru með á fyrstu plötu Trúbatrix, Trúbatrix - taka 1.