Sódóma bíður til girnilegs tónlistarhlaðborðs á eins árs afmælinu

09. mars 2010 Föstudaginn 12. mars mun tónleikastaðurinn Sódóma Reykjavík fagna eins árs afmæli staðarins með þéttri tónleikaorgíu. Fram koma hljómsveitirnar Jeff Who?, Lights on the Highway, Ultra Mega Technobandið Stefán, Sudden Weather Change, Hudson Wayne, Morðingjarnir, Reykjavík!, Cynic Guru, Franz og Jenni, Árstíðir, Nolo og 13. Herleigheitin byrja kl 20:00 og er aðgangur ókeypis.

Tónleikastaðurinn Sódóma Reykjavík er eins árs um þessar mundir og er óhætt að segja að staðurinn hafi fest sig rækilega í sessi á stuttum tíma. Þar eru haldnir tónleikar af öllum stærðargráðum með allskonar músík allt að 4 sinnum í viku. Lauslega áætlað gera það um 220 tónleikar sl. árið. Á þessum ári hefur fjöldi hljómsveita komi þar fram og ætla aðstandendur staðarins að bjóða til girnilegs tónlistarhlaðborðs í tilefni dagsins með mörgum af þeim sveitum sem komið hafa þar fram. Það verður ókeypis inn og guðaveigarnar á afmælistilboði, stór Tuborg bjór á 400 og skot á 400.