Íslensku tónlistarverðlaunin 2010

15. mars 2010 Íslensku tónlistarverðlaunin voru afhent við hátíðlega athöfn í Íslensku óperunni, laugardagskvöldið 13. mars, í beinni útsendingu á Stöð 2. ólafur Arnalds hlaut netverðlaun Tónlist.is en þau eru veitt þeim listamönnum sem hafa skarað fram úr í að koma sér og sinni tónlist á framfæri á netinu og hljómsveitin Dikta var valin vinsælasti flytjandinn í símakosningunni.

Hljómsveitin Sudden Weather Change var valinn bjartasta vonin, Davíð Þór Jónsson var valin tónlistarflytjandi ársins fyrir fjölþreifni til hljóðfæra og eiginleikann að virðast geta komið fram á mörgum stöðum í einu. Daníel Bjarnason var valin höfundur ársins fyrir tónverkin á plötunni Processions og verkið Bow To String eftir Daníel var valið tónverk ársins.

Jón Nordal tónskáld fékk heiðursverðlaun Samtóns, fyrir framlag sitt til íslenskrar tónlistar.

Hljómplatan ADHD, með samnefndri hljómsveit, var valin jazzplata ársins og platan Haydn Píanókonsertar með Eddu Erlendsdóttur var valin plata ársins í flokknum sígild/samtímatónlist. Umslag ársins var Swordplay and Guitarslay með hljómsveitinni Retrön. Umslagið er umbreytanlegt í kastalavirki með sýki og öllu. Mjög viðeigandi með ævintýralegum metalnum á plötunni.

Dreamin' með Feldberg var valið lag ársins og þau fluttu lagið á verðlaunahátíðinni. Sigríður Thorlacius var valin rödd ársins fyrir söng sinn með Hjaltalín og á plötunni Á ljúflingshól með Heiðurspiltum og að lokum var platan Terminal með Hjaltalín valin poppplata ársins.